په پنجشېر ولایت کې ۱۰ کلنه شخړه حل شوه
۱۴۴۵/۶/۷
د پنجشېر ولایت د پریار ولسوالۍ اړوند د خاواک په سیمه کې د دوو کورنیو تر منځ راپېښه شوې شخړه د یاد ولایت د سرحدونو، قومونو او قبایلو چارو آمریت په منځګړیتوب، د ولایت مقام او نورو ولایتي اداراتو په همکاري حل او په دوستي بدله شوه.
یاده شخړه چې لس کاله یې دوام کړی و، له امله یې دواړو کورنیو ته زیات مالي زیانونه اوښتي وو د پنجشېر ولایت مقام په هدایت د ولایتي اداراتو له پوره تحقیق او څېړنې وروسته په شخړه کې ښکېل لوري دوستي او پخلاینې ته راوبلل او د یوې غونډې په ترڅ کې طرفین یو بل ته غاړه غړۍ شول.
دا په داسي حال کې ده چې د سرحدونو، قومونو او قبایلو چارو وزارت د څه باندې دوه کاله په موده کې د هیواد په ټولو ولایتونو کې د ۷۰۰ په شاوخوا کې شخړې حل کړې او د قومونو تر منځ د یووالي په ټينګولو کې نه ستړې کېدونکې هلې ځلې کوي.
