په ولسي جرګه کې د نورستان ولایت د خلکو له استازې سره کتنه!
د سرحدونو او قبایلو چارو وزارت مالي او اداري مرستیال ښاغلي شجاع الملک جلاله نن چهارشنبې د ۱۳۹۸ لمریز کال د لیندۍ میاشتې په ۲۰ مه نېټه په داسې حال کې، چې د اطلاعاتو او عامه اړیکو رئيس ښاغلی عبدالوحید خاورې او د سرحدي څېړنو سلاکار ښاغلی ستانکزی هم حاضر و، په ولسي جرګه کې د نورستان ولایت د خلکو له استازې اغلې ډاکټر قمربانو اکبري سره د خپل کار په دفتر کې وکتل.
په دې کتنه کې آغلې قمربانو اکبري د یو لړ سیمه ییزو ستونزو شریکولو ترڅنګ د وزارت د اطلاعاتو او عامه اړیکو ریاست پورې اړوند جاښ مجلې د بډاینې او په دې برخه کې د قلمي همکارانو د زیاتېدو غوښتنې درلودې.
نوموړې همدا راز په هېواد کې د مېشتو درنو قومونو د انسجام او د نورستانۍ ژبې په ګډون د هېواد په بېلابېلو ژبو د خپرونو له امله د سرحدونو او قبایلو چارو وزارت هلې ځلې وستایلې.
ورپسې د وزارت مالي او اداري مرستیال ښاغلي جلاله په خپلو خبرو کې د نورستان ولایت د خلکو استازې ستونزې پر ځای وبللې او د ستونزو د هوارولو ډاډ یې ورکړ.
همدا راز ښاغلي جلاله د وزارت اړوند خپرنیزې مجلې هم آغلې قمربانو اکبري ته ډالۍ کړې.
