په ننګرهار ولایت کې دوه شخړې په دوستۍ بدلې شوې
۳/۱۱/۱۴۴۵
د ننګرهار ولایت د سرحدونو، قومونو او قبایلو چارو ریاست د دیني عالمانو او سیمه ییزو مشرانو په همکارۍ د دره نور ولسوالۍ په وایګل کلي کې د دوو کورنیو تر منځ ۶ کلنه دُښمني او د کونړ د پېچ درې ولسوالۍ د مېشتو دوو کورنیو ترمنځ ۲ کلنه شخړه چې له کبله یې ۶ تنه مړه او ۴ نور ژوبل شوي وو، د دوو بېلابېلو ناستو په ترڅ کې حل کړې. د شخړو د حل په مراسمو کې قومي مشرانو د منازعاتو په بدو پایلو خبرې وکړې سوله او بښنه یې د اسلام یو مهم اصل یاد کړ او په ښکېلو لوریو یې غږ وکړ چې نور یو له بل سره له دُښمني لاس واخلي. د ناستې پرمهال د سرحدونو، قومونو او قبایلو چارو رئیس قاري رحمت الله غازي عمر د امیرالمؤمنین حفظه الله د عفوې د فرمان ستاینه وکړه او دا یې خپل مسؤلیت وباله چې د خلکو تر منځ د ورورولۍ فضاء حاکمه کړي. د غونډې په وروستیو کې د مرکچیانو د عدل پرېکړې وکښل شوې، ښکېلو لوریو یو بل ته بښنه وکړه او سره غاړه غړۍ شول.
