په ننګرهار ولايت کې یوه شخړه په دوستي بدله شوه
د ننګرهار ولايت د سرحدونو، قومونو او قبايلو چارو رياست د مسؤلينو په مشرۍ د ځايي قومي مشرانو او ديني علماوو په همکارۍ د ياد ولايت په دره نور ولسوالۍ که د دوو کورنيو تر منځ اوږد مهاله منازعه چې له طرفينو پکې دوه کسه زخميان شوي وو حل او په دوستي بدله شوه.
په همدې مناسبت په جوړه شوې ناسته کې ځايي ديني علماوو او د ياد رياست مسؤلينو د شخړو د ناوړه عواقبو او د پخلاينې د ارزښت په اړه خبرې وکړې ويې ويل چې شخړې په ټولنه کې د بد مرغيو لامل ګرځي نو موږ ته پکار ده چې د شخړو د رامنځته کېدو په صورت کې له زغم او صبر څخه کار واخلو او په حل کولو کې يې له مسؤلو مراجعو څخه د همکاۍ غوښتنه وکړو چې ښه مثال يې د ننۍ شخړې حل ده، په پاي کې د مسؤلينو او مشرانو له خبرو وروسته ياده منازعه حل او دواړه قومونو سره پخلا شول.
