په میدان وردګو ولایت کې د قومونو د یووالي او همغږي غونډه
پنجشنبه شعبان المعظم /۲/ ۱۴۴۴
د سرحدونو، قومونو او قبایلو چارو وزارت په میدان وردګو ولایت کې د قومونو او خلکو د یووالي او همغږۍ په موخه یوه لویه غونډه جوړه کړه چې پر مهال یې د یاد وزارت سرپرست وزیر الحاج ملا نورالله نوري، د جرګو او قبایلي چارو د همغږۍ معین الحاج ملا عبدالخالق عابد، مل پلاوي، د یاد ولایت والي، مرستیال والي د ادارو مسؤلینو، سلګونه قومي مشرانو او علماوو ګډون درلود. د غونډې په پيل کې د دغه ولایت د سرحدونو، ق.ق چارو آمر ټولو راغلو میلمنو ته ښه راغلاست ووایه. وروسته د دیني عالمانو او مشرانو په استازیتوب څو تنو خبرې وکړې او زیاته یې کړه چې دا نظام د ولس د سرښندنو له برکته را منځته شوی او له پیل څخه یې د اسلامي شريعت د نافذولو شعار درلود چې هغه ته یې د عمل جامه ور اغوستې ده او له حکومت څخه مو غوښتنه ده چې ولس ته په هره برخه کې ډیر کار وکړي.
د ولایت مرستیال والي شیر احمد حقاني د دغه ولایت د قومونو د یووالي په اړه ډاډ وړاندې کړ زياته يې کړه چې د دغه ولایت ټول اوسېدونکي په یوه غږ د یووالي پر ټغر را ټول دي. د وزارت د دفتر رئیس شیخ حضرت ولي حقاني: دا یو ډېر قیمتي او ارزښت لرونکی نظام دی، د دې نظام او ازادي لپاره د افغانستان هر وګړي قرباني ورکړې ده، دا د افغانستان د هر وګړي وجیبه ده چې د دې نظام ملاتړ وکړي، او ورسره همکار و اوسي. د جرګو او قبایلي چارو معین ښاغلي عابد: وویل موږ د ولس ټولې غوښتنې د حکومت له مسؤلو چارواکو سره په لیکلي ډول شریکوو او ستاسو د ستونزو د حل په موخه هلته ستاسو غږ رسوو. سرپرست وزیر الحاج ملا نورالله نوري د غونډې ګډونوالو ته وویل: په دې نظام کې د هر چا حق دی او ټولو قربانۍ ورکړې دي دا زموږ او تاسو ټولو هیله وه چې یو خپلواک اسلامي نظام ولرو. زه دا ډاډ درکوم چې د افغانستان اقتصادي وضعیت پایدار دی. که د هیواد ولسونه همداسې د خپل نظام ملاتړ وکړي په ډیر کم وخت کې به مو هیواد خودکفایي ته رسیږي او ستاسو ټولو هره ستونزه د ا.ا.ا له خوا حل کيږي.
