په لوګر ولایت کې ولسونو ته د پراختیایي خدمتونو وړاندې کولو په موخه کمېټه جوړه شوه
د سرحدونو، قومونو او قبایلو چارو وزارت د سرحدي پلټنو معین الحاج مولوي محمد اسماعیل غزنوي ته د یوه پلاوي په مشري دنده سپارل شوې وه، ترڅو په لوګر ولایت کې د مرستیال والي په مشري د ډیورنډ فرضي کرښې ته څېرمه ولسوالیو خلکو ته د خدمتونو وړاندې کولو کمېټه جوړه کړي.
په دې موخه یاد پلاوي چې د یاد وزارت د پلان او پالیسۍ رئیس مولوي محمد نادر سنګین، د کارکوونکو چارو رئیس مولوي کریم شاه تیلوي او نور مسؤلینو هم پکې ګډون درلود، تېره ورځ لوګر ولایت ته سفر وکړ او هلته یې د دغه ولایت له مرستیال والي او د اړوند ادارو له رئیسانو سره ناسته وکړه.
په دغه ناسته کې د امیرالمؤمنین حفظه الله تعالی د حکم پر بنسټ یادې کمېټې ته دنده وسپارل شوه، چې د لرې پرتو او له خدمتونو بې برخو سیمو لومړنۍ ستونزې له نږدې وګوري او په دې اړه له پوره جزیاتو وروسته راپور یادې مرکزي کمېټې سره شریک کړي تر څو د یوې ځانګړې کړنلارې له مخې یادو ولسونو ته د سرکونو، روغتیا، اوبو، انرژۍ، مخابراتو او ښوونې روزنې په برخو کې کارونه پیل شي.
