په غزني کې يو شمېر سيمه ايزو چارواکو، علمي شخصيتونو او قومي مشرانو خپلې ستونزې او غوښتنې د سرحدونو او قبايلو چارو له وزير سره د حل په موخه شرېکې کړې!
د سرحدونو او قبايلو چارو وزير ښاغلي محب الله صميم نن غزني ولايت کې د خپلو لیدنو کتنو په دوام له يو شمېر دولتي چارواکو، قومي مشرانو او علمي شخصيتونو سره وکتل او د هغوی ستونزې، وړانديزونه او غوښتنې له نږدې واورېدې.
يادو مشرانو د يو لړ ستونزو شريکولو ترڅنګ د خپلو علمي او فرهنګي فعاليتونو په اړه معلومات وړاندى او غزني ولايت ته يې د سرحدونو او قبايلو چارو د وزير ښاغلي محب الله صميم سفر څخه مننه وکړه، چې ددوى ستونزې يې له نږدې واورېدې او خلکو ته يې مثبته روحيه ورکړه.
ورپسې ښاغلې محب الله صميم د نوموړو له ملي احساس څخه د مننې په ترڅ کې وويل دا هېواد د ټولو افغانانو شرېک کور دى او په ساتنه کې يې بايد له يو بل سره همکار واوسو.
دغه راز د سرحدونو او قبايلو چارو وزير ټينکار وکړ، چې د وسله والو مخالفينو ناوړه او منفي تبليغات نه شي کولای د افغانانو په تېره بيا د ملي امنیتي - ځواکونو روحيه او مورال کمزوری کړي.
