په غزني ولایت کې ۲۴ کلنه شخړه حل شوه
په غزني ولایت کې د مېشتو کوچیانو د للزي او د ناور ولسوالۍ د هزاره قومونو تر منځ ۲۴ کاله وړاندې پېښه شوې شخړه چې یو تن پکې وژل شوی و، تېره ورځ د یاد ولایت د سرحدونو، قومونو او قبایلو چارو ریاست په منځګړیتوب د دواړو لوریو په شتون کې حل شوه.
یاده شخړه چې د تېر امارت پر مهال رامنځته شوې وه، خو د مقتول کورنۍ ته د دیت (پور) د نه ورکولو له وجهې تر اوسه نا حل پاتې وه، چې له کبله یې طرفینو وخت نا وخت یو بل ته زیانونه اړول، تېره ورځ یې د یاد ریاست په هلوځلو دوستي ته غاړه کېښوده.
د دغې شخړې د حل په غونډه کې د یاد ولایت د سرحدونو، قومونو او قبایلو چارو رئیس مولوي جان محمد حاجي مؤمن د دواړو لوریو د قضیې په اړه مفصل معلومات ترلاسه کړل، د علماوو او مل پلاوي په همغږي یې د دوی ترمنځ د خیر پرېکړه وکړه چې د فیصلې له ابلاغ وروسته دواړو لوریو پرې قناعت وکړ او په خوښۍ یې یو له بل سره د ژوند تېرولو ژمنه وکړه.
