په غزني ولایت کې د ولسونو د اتحاد غونډه
شنبه ۳/جمادي الثاني/۱۴۴۷
د سرحدونو، قومونو او قبایلو چارو وزارت د جرګو او قبایلو چارو معین الحاج مولوي محمد علي جان احمد او ورسره مل پلاوي نن په غزني ولایت کې د ولسونو، اتحاد، اسلامي نظام بقاء او هوساینې تر عنوان لاندې لویه ولسي غونده جوړه کړه چې پر مهال یې د ولایتي ادارو مسؤلینو په ګډون، قومي مشرانو، سپین ږیرو او ځوانانو هم برخه لرله.
قومي مشرانو د دغې غونډې په ترڅ کې د اسلامي امارت له خدمتونو ستاینه وکړه ویې ویل: موږ باید د اسلامي امارت شکر وباسو، ځکه امنیت او ثبات د دې نظام د هڅو نتیجه ده، چې د ولسونو په همکارۍ یې ترلاسه کړی. دوی د یادې غونډې له لارې په ټول ولس غږ وکړ چې د ورورۍ او یووالي لاسونه سره ورکړي او په ګډه د دښمنانو پر وړاندې قوي او متحد ودرېږي.
وروسته د جرګو او قبايلي چارو د همغږۍ معین ښاغلي احمد وینا وکړه ویې ویل: افغانانو د خپل ملت د عزت او ازادۍ لپاره د اشغالګرو په وړاندې بې مثاله مبارزه وکړه او خپل سرونه یې نذرانه کړل. هغه زیاته کړه: زموږ د میلیونونو شهیدانو ستر مقصد همدا وو، چې پر ځمکه د رب العزت قانون نافذ شي، ترڅو رڼا یې په ټوله نړۍ خپره شي. هغه د خلګو د قربانیو په قدرداني سره وویل: په دې سپېڅلې خاوره د اسلامي بیرغ رپېدل، د الله د لارې د پیروانو د کلک عزم او د دین د لوړتیا څرګندونه کوي.
همداراز د وزارت د څړځایونو او خدمتونو د اقتصاد رئيس مفتي لعل محمد منیب زیاته کړه:
افغانستان د څو لسیزو په اوږدو کې د ډېرو بریدګرو او ظالمو ځواکونو د ماتې ځای پاتې شوی دی. اوس د افغان ملت پر وړاندې د انسان قاچاق او وحشت په نوم نوې جګړه پیل شوې ده. افغان ملت باید ویښ او هوښیار پاتې شي او په کلک عزم سره دا جګړه وګټي.
