په سمنګان ولایت کې دوې بېلابېلې شخړې چې د خلکو تر منځ یې ستونزې را پیدا کړې وې، هوارې شوې

په سمنګان ولایت کې د بېلابېلو ناستو پر مهال دوه شخړې چې یوه یې د ترافیکي حادثې په نتېجه کې د یوه سړي د وژنې له کبله او بله یې د دوو کسانو ترمنځ د فزیکي جګړې له امله رامنځته شوې وه، د یاد ولایت د سرحدونو، قومونو او قبایلو چارو آمریت، سیمه ییزو مشرانو او د شخړو د حل کمېسیونونو له لوري حل شوې. د پورته شخړو له جملې لومړۍ یې یوه اوونۍ وړاندې د یوه ۵۸۰ ډوله موټر د ترافیکي پېښې پرمهال د یوه کس د مړینې له امله رامنځته شوې شخړه وه، چې د مصلحینو او مسؤلینو په همکارۍ د دواړو لوریو له قناعت وروسته حل شوه او دواړو خواوو پکې یو بل ته بښنه وکړه. دویمه یې د دوو کسانو ترمنځ د یوې موضوع پرسر د یو بل وهلو او اخ او ډب منازعه وه، چې له وجهې یې دواړو کورنیو یو بل ته زیات خنډونه جوړ کړي وو، د یاد آمریت مسؤلینو او قومي مخورو د یوې ناستې په ترڅ کې په سوله او دوستي بدله کړه.