په دایکندي ولایت کې د دوو کورینو تر منځ شخړه
په دایکندي ولایت کې د پاتو ولسوالۍ د بیري او سپرمي کلیو د دوو کورنیو تر منځ رامنځته شوې شخړه د لا بدو پایلو او له بدۍ څخه د مخینوي په موخه په سوله بدله شوه.
د دغې شخړې د حل پر مهال د دایکندي ولایت د سرحدونو، قومونو او قبایلو آمر حافظ محب الله سجاد، د امریت نورو کارکوونکو، قومي مشرانو او دیني عالمانو حضور درلود.
ناستې ته د یاد ولایت د سرحدونو، قومونو او قبایلو آمر ښاغلي سجاد وویل: د ملي یووالي راوستل، د قومي شخړو حل، د قومونو اړتیاوې او ستونزې اورېدل او د دولت او ولس ترمنځ ښې اړیکې رامنځته کول د دې ادارې مسؤولیت دی. هغه زیاته کړه: د دغه امریت دروازه د ټولو قومونو پر مخ خلاصه ده، موږ تل هڅه کوو چې د دایکندي ولایت د ټولو قومونو ترمنځ یووالی ، همغږي او ورورولي رامنځته کړو.
وروسته یاد پلاوي د دواړو لوریو څخه په اجازه او منځګړیتوب د قضیي تر څېړنې او مطالعې وروسته پرېکړه وکړه او د دې فیصلې منلو ته یې دواړه لوري راوبلل.
په قضیه کې دخیلو اړخونو په دغه پرېکړه خوښي وښوده او تعهد یې وکړ چې له شخړې به لاس اخلي او یوله بل سره به د ورورګلوۍ په فضاء کې ژوند کوي. دوی د یاد امریت له کړنو او ستړیاوو څخه مننه وکړه چې د خلکو تر منځ د یووالي رامنځته کولو او د اختلافاتو د حل په برخه کې کار کوي.
