په دايکندي ولايت کې د قومونو ترمنځ د يووالي او همغږۍ په مناسبت غونډه
۱۴۴۵/۳/۳۰
په دغه غونډه کې د سرحدونو، قومونو او قبایلو چارو سرپرست وزیر الحاج ملا نورالله نوري مل پلاوي، د دايکندي ولايت مرستيال والي ، دیني علمانو، او قومي مشرانو ګډون کړی وو.
لومړى د دايکندي ولايت مرستيال والي مولوي احسان الله رحمت يار د قومونو ترمنځ په اتحاد او اتفاق خبري وکړي ويې ويل چې په دایکندي ولایت کې ټول قومونه د یووالي په ټغر را ټول او د خپل هېواد د بيارغونې لپاره په هره برخه کې له اسلامي امارت سره همکار دي.
دغه راز په ياده غونډه کې يو شمېر ديني عالمانو او قومي مخورو په هېواد د اسلامي امارت حاکميت د شهیدانو د وینو برکت ياد کړ زیاته یې کړه چې د افغانستان ولسونه پر حاکم حکومت حق لري چې په هره برخه کې ورته خدمت وکړي.
ورپسې د وزارت د جرګو او قبایلي چارو د همغږۍ معین الحاج ملا عبدالخالق عابد په ياد ولايت کې د ا.ا.ا ټول مسؤلین له ولس سره حسنه برخورد او ښه چلند ته وهڅول. نوموړي وویل چې د ا.ا.ا د اداراتو دروازې د هر چا پر مخ خلاصې دي، هر څوک خپلې ستونزې د مسؤلو چارواکو په همکارۍ په اسانه حل کولای شي او تر هر ځایه یې رسولای شي.
وروسته کې سرپرست وزير ښاغلي نوري د کفارو او ملگرو پر وړاندې د شل کلنې مقدسې مبارزې په اړه وينا وکړه ويې ويل: په افغانستان کې د مجاهدينو شل کلن جهاد، جنګ نه بلکې یوه الهي فریضه او مقدسه مبارزه وه چې د یوه سپیڅلي هدف د تر لاسه کولو لپاره تر سره شوه. په پايله کې يې له ډېرو قربانیو وروسته هغه هدف ترلاسه شو کوم چې د اسلامي امارت د هر مجاهد غوښتنه وه.
د دغه وزارت د جرګو او قبایلي چارو رئیس شیخ حضرت ولي حقاتي غونډې ته د خبرو پر مهال د اسلامي امارت د یووالي او اطاعت یادونه وکړه او ویې ویل چې د دې صف په لیکو کې قوم پرستي او تعصب ته ځای نشته دلته ټول افغانان یوازې د اسلام تر چتر لاندې را ټول دي.
