په جوزجان ، سمنګان، کندز او پروان ولایتونو کې څلور شخړې حل شوې
يکشنبه ۷ ربيع الأول ۱۴۴۷
د جوزجان ولايت په مرکز شبرغان کې د ځمکې د ملکيت پر سر راپورته شوې ۶ کلنه شخړه، چې دواړو لوريو ته يې ډېر اختلافات پيدا کړي وو د ياد ولايت د سرحدونو، قومونو او قبايلو چارو رياست مسؤلينو په همکاري حل او دواړه خواوې د دوستي په ټغر راټول شول.
همدارنګه د کندز ولايت په مرکز کې د څو کورنيو ترمنځ راپورته شوې شخړه، چې يو کس پکې وژل شوی و او ګڼې کورنۍ ستونزې يې را ولاړې کړې وې د دغه ولايت د سرحدونو، قومونو او قبايلو چارو رياست له لوري هواره او دواړه کورنۍ سره پخلا شوې.
ورته مهال د سمنګان ولايت د سرحدونو، قومونو او قبايلو چارو آمريت مسؤلينو په دغه ولايت کې هغه درې کلنه کورنۍ شخړه هواره کړه، چې وخت ناوخت به يې يو بل ته ستونزې جوړولې.
د دې ترڅنګ د پروان ولايت د سرحدونو، قومونو او قبايلو چارو آمریت له مل پلاوي سره په ګډه د بغلان تاله او برفک ولسوالۍ ورسندان سيمې ته د خپل سفر په ترڅ کې هغه مرورې کورنۍ سره پخلا کړې، چې څه موده وړاندې يې د ځينو مالونو او پيسو پر سر ترمنځ لوی جنجالونه رامنځته شوي وو.
