په ارزګان ولایت کې د دوو کورنیو تر منځ شخړه هواره شوه
یکشنبه/۱۰/ شوال المکرم/ ۱۴۴۴
د ارزګان ولایت د مرکز ترینکوټ اړوند د درفشان په کلي کې پېښه شوې شخړه چې د یوه تن د وژلو له امله را منځته شوې وه حل وفصل شوه.
د دغې روغې جوړې پر مهال د یاد ولایت مرستیال والي مولوي مزمل، د سرحدونو، قومونو او قبایلو رئیس مولوي عبدالرشید هدایت الله، د ګڼو نورو ادارو مسؤلینو، علماء کرامو او سپین ږیرو حضور درلود.
د ناستې د ګډونوالو په استازیتوب څو تنو مسؤلینو، مشرانو او قومي مخورو خبرې وکړې او زیاته یې کړه: څوک چې د الله (ج) د رضا په خاطر نورو بندګانو ته بښنه کوي او نرمي ورسره کوي هغوی ته به خدای (ج) بښنه وکړي. دوی په خپلو خبرو کې ټول قومونه د یووالي او وروګلوی لور ته را وبلل او په سوله ییز ډول د دې ډول مسایلو د حل غوښتونکي شول.
په اخیر کې د وژل شوي کس کورنۍ وژونکې کس ته په خپل رضایت سره بښنه وکړه او ناسته په دوعا سره پای ته ورسېده.
