پاميريانو ته ژمنۍ مرستې ولېږدول شوې.
۱۴۴۴/۵/۹ هـ ق
د ریاست الوزراء له خوا د سرحدونو، قومونو او قبايلو چارو وزارت تر سرپرستي لاندې د ټاکل شوي هيئت له خوا هغه ژمنۍ مرستې چي شاوخوا اتلس قلمه خوراکي او غير خوراکي توکې پکې وو د لوی او واړه پامير نماينده ګانو ته وروسپارل شوې.
د سرحدونو، قومونو او قبایلو چارو وزارت د دفتر رئيس شيخ حضرت ولي حقاني، د همدې وزارت د اطلاعاتو اوعامه اړيکو رئيس ملا حمدالله فطرت د همدې وزارت د قومي چارو سلاکار امين الله پاميري او پېښو ته د رسېدو په چارو کې د دولت وزارت د بشري زېرمو رئيس حافظ محمود الحسن چي د هيئت غړيتوب يې درلود ورسره د بدخشان ولايت د همغږۍ هيئت چي د دفتر رئيس خيرالله حکيمي، د همدې ولايت د استخباراتو رياست مرستيال انجنير عيد محمد عيار، د پېښو پر وړاندې مبارزې رئيس شيخ اکرم او ځيني نور مسؤلين پکې وو، د واخان ولسوالۍ ته سفر تر سره کړ.
ياد هيئت لومړی د واخان ولسوالۍ ګاز خان سيمې ته سفر وکړ او د لوی پامير د خلکو مشر او نماينده حاجي محمود ته يې مواد تسليم او د لارې د نشتون له کبله يې د ولي جان نومي کس په ګودامونو کې ذخيره کړل.
دغه راز ياد هيئت د ژمنيو مرستو د پاتي کاروان په ملتيا د کوچني پامير پر لور وکوچيد چې د سرحد بروغيل په سېمه کې د لارې د بندېدو له کبله تم شو او د کوچني پامير د خلکو دريو نماينده ګانو ته چې د شوراګانو مشر حاجي بوتو هم ورسره وو مواد وسپارل شول.
د يادونې وړ ده چې پاميريانو ته دا او دېته ورته مرستې له هغه وروسته ترسره کيږي چې تيره اسد مياشت کې د سرحدونو، قومونو او قبایلو چارو سرپرست وزير الحاج ملا نورالله نوري يادې سيمې ته شپږ ورځنی سفر تر سره کړ او د خلکو ستونزې يې له مشاهدې سره سره ددوئ له خولې هم واورېدلې؛ د پاميري هيوادوالو ټولې ستونزې يې تر کابينې پورې ورسولې او دغو ژمنيو مرستو ترڅنګ تر دې مهاله د يوې پايې مخابراتي شبکې انتن،ورېښمو لارې د رغېدلو او د کلينکونو د ارتقا او تجهيزولو اړوند پرېکړې شوې.
