((موږ ته دا معلومه شوه، چې اسلامي امارت پرموږ حکومت نه بلکې زموږ خدمت کوي))
جمعه ٣٠ شوال ۱۴۴۷
د سرحدونو، قومونو او قبايلو چارو وزیر ملا نورالله نوري په سرپل ولایت کې له ولسي استازو، مخورو سپين ږيرو او علماوو سره د غونډې پرمهال په خپلو څرګندونو کې وویل: افغانستان اوس له تنظيمونو خلاص، یو متحد هيواد دی، چې دا پرافغانانو د الله تعالی یوه لویه لورینه ده. نوموړي په اسلامي نظام کې د خلکو عزت خوندي وباله، زياته يې کړه، چې موږ د ولسونو خدمت د ځان فريضه بولو.
دغې ناستې ته د جرګو او قبايلي چارو د همغږۍ معين مولوي محمد علي جان د خپلې وینا پرمهال وویل: کفار د بشر حقونه په افغانستان کې غواړي، خو په غزه کې یې ټول انساني حقوق تر پښو لاندې کړي. نوموړي د افغانانو اطاعت او اتحاد بې سارې وباله او ولسونو ته یې د اتحاد او حُریت ساتلو سپارښتنه وکړه.
دغه راز د امربالمعروف نهی عن المنکر او شکایتونو اورېدلو وزارت مسلکي معین شیخ نور محمد حقاني زیاته کړه، اسلامي امارت هغه نظام دی، چې د ټولو خلکو عزتونه، حریت او حقوق پکې خوندي دي، نوموړي د ناستې خلکو ته وویل چې د دښمن په تبلیغاتو مه تېر وزئ بلکې هغه درک کړئ چې ستاسې له مخې دي.
قومي مخورو او علماوو په تېرو پنځو کلونو کې د اسلامي امارت له لوري د ترسره شویو خدمتونو یادونه وکړه، ویې ویل: موږ ته دا معلومه شوه، چې د اسلامي امارت مسؤلین پرموږ حکومت نه کوي بلکې دوی زموږ د خدمت لپاره راغلي دي.
په دغه غونډه کې د سرپل د والي مولوي احمد شاه دین دوست په شمول د ولسوالیواستازو، قومي مخورو، علماء کرامو او د پوهنتون استادانو هم ګډون کړی وو.
