له ښځینه فعالانو او مخورو سره ناسته!
د سرحدونو او قبایلو چارو وزارت سرپرست اونوماند وزیر ښاغلي محب الله صمیم نن دوشنبې د روان کال د وږي میاشتې په ۳۱مه نېټه د هېواد له یو شمېر ښځینه فعالانو آغلې زرمینې، آغلې یعقوبي، آغلې رضایي او یو شمېر مخورو سره د خپل کار په دفتر کې وکتل.
په دې کتنه کې راغلو ښځینه فعالانو او مخورو د سرحدونو او قبایلو چارو د سرپرست او نوماند وزیر په توګه د ښاغلي محب الله صیم ټاکنه پرځای اقدام وباله او د مبارکۍ ویلو په ترڅ کې يې له وزارت سره د ګډ کار او د همغږو هلو ځلو ډاډ ورکړ. همدا راز نوموړو د وزارت په بېلابېلو برخو کې د ښځو د ونډې په زیاتوالي ټینګار وکړ.
ورپسې ښاغلي صمیم د دوې له راتګ او ملاتړ څخه خوښي څرګنده کړه، وې ویل: موږ د دې شاهیدان یو، چې ښځو تل د نارینو په څېر د هېواد په بېلابېلو برخو او چارو کې فعاله ونډه اخیستې ده او د ښځو له حضور پرته یوه ټولنه نیمګړې ده، وزارت به د استخدام او نورو چارو په برخو کې ښځو ته زیاته پاملرنه وکړي.
