لغمان کې د ۱۳ کلنې خونړۍ دښمنۍ ترڅنګ فارياب کې هم ورته شخړه حل او فصل شوه
شنبه ۲۷ ربیعالاول ۱۴۴۷
د لغمان ولایت الیشنګ ولسوالي په شکۍ کلي کې د دوو کورنیو ترمنځ هغه اوږد مهاله ۱۳ کلنه دښمني، چې له امله يې دواړو خواوو ته درانه ځاني او مالي تاوانونه رسېدلي وو حل او د امن په ټغر سره کېناستل.
د دغې خونړۍ شخړې په ترڅ کې له دواړو غاړو ۹ کسان وژل شوي او ۳ نور ټپیان شوي وو، چې د ياد ولايت د سرحدونو، قومونو او قبايلو چارو آمريت مسؤليو، قومي مشرانو، علماوو او ځايي خلکو په بيا بيا هڅو د سولې او ورورولي په فضا باندي بدله شوه.
په ورته مهال د فارياب ولايت د سرحدونو، قومونو او قبايلو چارو رياست مسؤلينو د ولسي مشرانو په همغږۍ د دې ولايت دولت آباد ولسوالي په فتح آباد سيمه کې د يوې ترافيکې پېښې له امله راپوره شوې شخړه حل او دواړه خواوې يې د سولې له خواږه نعمته برخمنې کړې.
د دې پېښې په نتيجه کې يوکس وژل شوی و او ۱۹ څاروي يې پکې هم له منځه تللي وو، چې د اسلامي امارت مشرانو يې ترمنځ د خير په فيصلې کولو سره هغوی پخلا او متضررو اشخاصو ته د شريعت په چوکاټ کې حق وسپارل شو.
