فارياب ولايت ته د قومي ستونزو د حل په موخه سفر
شنبه ۱۹ ذوالقعده ۱۴۴۶
د سرحدونو، قومونو او قبایلو چارو وزارت د جرګو او قبایلو چارو د همغږۍ معین الحاج مولوي محمد علي جان احمد تېره ورځ فارياب ولايت ته په خپل کاري سفر کې د دې ولايت له ولايتي مسؤلينو، قومي مشرانو او ولسي خلکو سره د يو لړ ستونزو د هواري په موخه ناسته ترسره کړه.
د دغې ناستې پرمهال ښاغلي احمد لومړی د فارياب ولايت په مقام کې له والي عبدالاحد فضلي او د ستونزو د حل په موخه د ټاکل شوې ولايتي کميټې له غړو سره مجلس وکړ، چې د مسؤلينو لخوا د ياد ولايت قرمقول ولسوالۍ ځيني قومي ستونزې شريکې شوې، چې پکې د عيدوزي او اچکزي قومونو ترمنځ د ځمکې د ملکيت پر سر د رامنځته شویو جنجالونو په اړه بحث وشو.
د ياد مجلس وروسته ښاغلي احمد له مل پلاوي سره قرمقول ولسوالۍ ته د خپل سفر په ترڅ کې له ولسوال سره ترليدنې وروسته د قومي مشرانو، علماوو او ځايي خلکو په همغږۍ له پوره تحقيق او څېړنو سره د عيدوزي او اچکزي قومونو ترمنځ اوږد مهاله ستونزه حل او دواړه قومونه يې د ورورۍ په ټغر سره کېنول.
ښکېلو قومونو د سرحدونو، قومونو او قبایلو چارو وزارت د جرګو او قبایلو چارو د همغږۍ معین الحاج مولوي محمد علي جان احمد د دې هڅو قدردانی وکړه، د خوښي په څرګندولو سره يې ژمنه وکړه، چې تردې وروسته به يو بل ته هېڅ ډول ستونزې نه جوړوي په اتفاق او ورورولۍ سره به خپل ژوند ته ادامه ورکوي.
