زموږ لومړیتوب د ولسونو د ستونزو اورېدل او هوارول دي
دا څرګندونې د سرحدونو او قبایلو چارو وزیر ښاغلي محب لله صمیم د پکتیا ولایت له یو شمېر قومي مشرانو او مخورو سره په کتنه کې وکړې په دې کتنه کې راغلو مشرانو خپلې یو لړ سیمه ییزې ستونزې، چې د پوهنې، پراختیایي پروژو د تطبیق، روغتیا او نورو برخو کې د حل په موخه له ښاغلي صمیم سره شریکې کړې او دغه راز راغلو قومي مشرانو او مخورو له جمهوري نظام څخه ملاتړ څرګند کړ، دوی ژمنه وکړه چې هېڅ فرد او ډلې ته به اجازه ورنکړي چې د شته نظام د تخریب هڅې وکړي .
ورپسې د سرحدونو او قبایلو چارو وزیر ښاغلي محب الله صمیم دوی ته د ښه راغلاست تر څنګ وویل چې د لویې پکتیا ولسونو تل د نظام ملاتړ کړی او په دې سپېڅلې لار کې یې بې شمېره قربانۍ ورکړي نوموړي له راغلو مشرانو وغوښتل چې په خپلو سیمو کې ولسونه یووالي او یو بل منلو ته راوبولي تر څو ستونزې حل او ټولنه مو د پرمختګ پر لور ګام اوچت کړي، په پای کې ښاغلي صمیم دوی ته ډاډ ورکړ چې ستونزې به یې د حل په موخه له اړوندو ادارو سره شریکې کړي.
