زمري(۲۸مه) هېواد د خپلواکۍ بېرته تر لاسه کولو( ۱۰۱) یو سلو يومه کاليزه کونړ ولايت کې په شاندارو مراسمو سره ونمانځل شوه.
ياد مراسم چې په څوکۍ ولسوالۍ کې تر سره شول د کونړ والي محمد اقبال(سعید) سربېره، د ولایتي شورا ريیس او غړيو، امنیتي مسوولینو، مشرانو جرګې غړي محمد طیب(عطاء)، د سرحدو او قبایلو چارو وزارت مالي او اداري مرستیال شجاع الملک جلاله خان، د ولايتي ادارې نږدې ټولو رييسانو، قومي مشرانو، ځوانانو، علماوو، امنیتي ځواکونو، مدني فعالانو، ښوونکيو او د ښوونځیو لسګونو زده کوونکيو برخه اخېستې وه.
همدا راز د يادو نمانځنو په دوام د کونړ ولايت سرحدونو او قبايلو چارو رياست په انګړ کې ملي بيرغ د سرحدو او قبایلو چارو وزارت مالي او اداري مرستیال شجاع الملک جلاله خان، د ياد رياست رييس استاد فريد الله(حسام)، قومي مشرانو، علماوو او د دې اداري کارکوونکيو په لاسونو پورته شو، ياده دې وي چې دا بيرغ د(۱۸) اتلس متره په لوړوالي، د خپلواکۍ بېرته تر لاسه کولو(۱۰۱) یو سلو يومې کالېزې په وياړ جوړ شوی چې د اسعد اباد ښار له ګڼو ځايونو ليدل کېږي.
