د کوچیانو محصولاتو ته د بازار موندنې نندارتون
چهارشنبه/ ۵/ذوالقعده/ ۱۴۴۷
د کرنې، اوبولګولو او مالدارۍ وزارت په نوښت د پلازمېنې کابل په بادام باغ سیمه کې جوړ شوی درې ورځنی نندارتون، چې د کرنیزو محصولاتو د بازارموندنې په موخه جوړ شوی و، نن ورځ د سرحدونو، قومونو او قبایلو چارو وزارت د کوچیانو چارو د سمون ریاست له لوري د کوچیانو محصولات او تولیدات هم پکې نندارې ته وړاندې شول.
د یاد نندارتون د پرانیستې پرمهال د سرحدونو، قومونو او قبایلو چارو وزارت د سرحدي پلټنو معین مولوي عنایت الله شجاع، د کوچیانو چارو سمون لوی رئیس ملا محمد بصر صاحب زاده، د کوچیانو د اقتصادي خدماتو او څړځاینو رئیس مولوي هدایت الله حقاني او د کوچیانو د اسکانو رئیس مولوي محمداسحاق ادریس هم ګډون کړی وو.
په دغه نندارتون کې د هېواد د مختلفو تولیدي محصولاتو تر څنګ، د کوچیانو دودیز لاسي صنایع او د مالدارۍ اړوند محصولات نندارې ته وړاندې شول، چې د ګڼ شمېر لیدونکو پام یې ځان ته را جلب کړ او دا لړۍ به تر دريو ورځو روانه وي.
له دغه نندارتون هدف د کوچیانو اقتصادي وده او د دوی د لاسي صنایعو او مالدارۍ محصولاتو او تولیداتو نندارې ته وړاندې کول او د کوچیانو د صنایعو ملاتړ بلل شوی.
