د ډیورنډ فرضي کرښې او نورو سرحدي سيمو اوسېدونکو ستونزې حل کېږي
دوشنبه-۳۰/۱/۱۴۴۶
د عالیقدر امير المؤمنين شيخ صاحب حفظه الله تعالی په حکم، د سرحدونو، قومونو او قبايلو چارو د وزیر الحاج ملا نورالله نوري په مشرۍ د سرحدي ولايتونو مرستيالانو، اړوندو ولايتي رئيسانو، د سرحدي ولسوالیو ولسوالانو او په یادو سرحدي ولسوالیو کې د دفاع وزارت د استازو په ګډون، په ډيورنډ فرضي کرښه او نورو سرحدي ولسوالیو کې د مېشتو اوسېدونکو د اولویه ستونزو د حل لپاره په یادو ولایتونو کې د سرحدي خلکو د ستونزو د حل لپاره د عامې روغتیا، مخابراتو، اوبو او انرژي، فوائد عامې، پوهنې، کلیو پراختیا او بیا رغونې او د سرحدونو او قبایلو چارو له ریاستونو له رئیسانو څخه کمېټې جوړېږي.
دغه کمېټې به د يادو سيمو د اوسېدونکو لپاره لومړني خدمات، د ديني او عصري زده کړو، روغتيا، مخابراتي شبکو، سړکونو او د څښاک اوبو ته د لاسرسي په برخو کې تشخیص او تثبیت کوي او عملاً به کار پیلوي. په حکم کې د ماليې وزارت ته سپارښتنه شوې، چې دغې کمېټې ته د اړتيا وړ بودجه چمتو کړي او په دې برخه کې عملي ګامونه واخلي.
په دغه اقدام سره به د افغانستان د ټولو سرحدي سیمو د خلکو مشکلاتو ته تر ممکنه حده رسیدنه وشي او د هغوی اړتیاوې به پوره کړل شي. د سرحدي سیمو د اوسېدونکو د ستونزو د حل دا کمېټې به په ډېرو لنډو شپو کې په کارونو پیل وکړي چې په پایله کې به یې د خلکو لومړیتوبونو ته په کتلو سره په ګڼو برخو کې خلک له خدمتونو برخمن شي.
