د پکتیکا ولایت قومي سپین ږیرو او علماوو د سرحدونو، قومونو او قبایلو چارو له وزیر سره ولیدل
شنبه/ربیع الاول/١٤٤٦/۴
د پکتیکا ولایت برمل ولسوالۍ راغلیو قومي مشرانو د ملي یووالي په برخه کې د سرحدونو، قومونو او قبايلو چارو وزارت هڅې وستایلې، دوی د اسلامي امارت په راتګ سره د خلکو حقوق خوندي وبلل او له خپله اړخه یې له حکومت سره د لا زیاتې همکارۍ ژمنه وکړه، راغلیو قومي مخورو په خپلو خبرو کې له ښاغلي نوري سره د سرک، روغتيا او په ځینو نورو برخو کې شته ستونزې شریکې کړې او د حل غوښتنه یې وکړه.
محترم الحاج ملا نورالله نوري د خپلو خبرو په ترڅ کې د اسلامي امارت د حاکمیت په برخه کې د دوی قربانۍ د قدر وړ وبللې او زیاته یې کړه چې اسلامي امارت د ولس په سرښندنو قائم شوی اوس هم د ولس همکاري ته اړتیا لري، همدا راز نوموړي زیاته کړه د سرحدونو، قومونو او قبایلو چارو وزارت دنده لري چې د خلکو ستونزې واوري او په حل کولو کې يې ګړندۍ هڅې وکړي.
ښاغلي نوري صاحب د دوی د ستونزو د حل په اړه وويل موږ هڅه کوو چې ستاسې ستونزو ته د وس تر بریده رسیدګي وکړو او د حل په موخه یې چټک ګامونه واخلو.