د پکتیکا ولایت د ارګون له یو شمېر قومي مشرانو، دیني عالمانو، مخورو او ځوانانو سره کتنه!
د سرحدونو او قبایلو چارو وزیر ښاغلي محب الله صمیم نن مازدیګر د پکتیکا ولایت د ارګون له یو شمېر قومي مشرانو، دیني عالمانو، مخورو او ځوانانو سره د وزارت د کنفرانسونو په تالار کې وکتل.
په دې کتنه کې راغلو قومي مشرانو د سرحدونو او قبایلو چارو وزیر یو ولسي شخصیت یاد کړ او د نوموړي تېرې کړنې یې، چې د پکتیکا د والي په توګه یې ترسره کړې وې د ستاینې وړ وبللې او خپلې یو لړ سیمه ییز ستونزې، چې د ځوانانو لپاره د زده کړې زمینې برابرول، وزګارتیا، د یادې سیمې د ستراتیژیک موقعیت او د ارګون د ولایت کېدو په برخه کې وې، د وزارت له مشرتابه سره شریکې کړې.
دوی دغه راز د سرحدونو او قبایلو چارو وزارت د ولسونو د ستونزو هوارولو په برخه کې یو مهم وزارت وباله او ټینګار یې وکړ، چې د پکتیکا ولسونو تل د خپل نظام او خاورې ساتلو څخه دفاع کړې او هم یې ملاتړ کړی، چې اوس هم خپلو هلو ځلو ته د تېر په څېر دوام ورکوي او د خپلو امنیتي او دفاعي ځواکونو څخه په کلکه ملاتړ کوي.
ورپسې ښاغلي محب الله صمیم د خپلو خبرو په ترڅ کې د یادو قومي مشرانو له هېوادني احساس څخه مننه وکړه او د دوی ستونزې یې پر ځای وبللې وې ویل: د تاسو درنو مشرانو په کلتور او ستونزو ښه پوهېږم سره له دې چې ستونزې شتون لري خو بیا هم تاسو تل د خپل نظام او خلکو ترڅنګ ولاړ یاست او د هېواد د امن او ثبات په لار کې مو قربانۍ ورکړي.
ښاغلي صمیم زیاته کړه، زه خپل مسؤلیت بولم، چې ستاسو مشرانو وړاندیزونه، غوښتنې، نظریات او سلامشورې له اړوندو ادارو سره شریکې کړم، ترڅو ورته د حل لارې چارې پیداشي.
