د پکتیا ولایت د ځاځي قوم له استازو سره کتنه
شنبه-۲۱/۱/۱۴۴۶
د سرحدونو، قومونو او قبایلو چارو وزارت د جرګو او قبایلو چارو معین مولوي محمد علي جان احمد د پکتیا ولایت مرکز ګردېز د ځاځي قوم له مشرانو سره په خپل کاري دفتر کې وکتل.
د دغې کتنې پر مهال په ګردېز کې د ځاځي قوم له یوولسو کلیو څخه راغلیو قومي مخورو په امنیتي او رغنیزو چارو کې د اسلامي امارت پاملرنه وستایله او په خپله سیمه کې یې د همکارې مؤسیسې په ملاتړ، د جوړېدونکې روغتیایي کلینیک د ځایګې پر سر له نورو ټبرونو سره د اختلافاتو د حل همکاري وغوښته. دوی د اشغال پر مهال د وزارت د مرستیال له ستړیاوو یادونه وکړه او ښاغلی احمد یې د دوی د ستونزو د حل لپاره وړ کس وباله.
د جرګو او قبایلو چارو د همغږۍ مرستیال ښاغلی احمد قومي مخورو ته له هرکلي وروسته وویل: د افغانستان ټول ولسونه مېړني دي او د اشغال پر وړاندې یې د خپلو مجاهدینو کلک ملاتړ کړی، اسلامي امارت به هیڅکله د دې خلکو قدر هېر نه کړي. نوموړي د روغتیایي مرکز د موقعیت په اړه راغلیو مشرانو ته ډاډ ورکړ، ویې ویل؛ ستاسې ترشا یو داسې نظام ولاړ دی چې د دې خاورې د هر فرد حقوق پکې خوندي دي. هغه وویل چې یاده موضوع به د ریاست الوزراء له عالي مقام سره شریکه کړي، تر څو د وزارتونو یو هراړخیز پلاوي وټاکل شي او یاده موضوع هواره کړي.
