د وزارت پوځي افسر ته د فوق العاده ترفیع منظورېدل!
په هغې غونډه کې، چې نن یکشنبې د چنګاښ میاشتې پر ۲۰ مه نېټه د سرحدونو او قبایلو چارو وزارت د سرحدي څېړنو په معینیت کې جوړه شوې وه، د سرحدي څېړنو معین ښاغلي ډاکټر محمد آصف قاضي زاده، یو شمېر رئيسانو او پوځي منسوبینو ګډون درلود.
د غونډې په پیل کې ښاغلي قاضي زاده د ښاغلي محمد ادریس هڅې او لاسته راوړنې وستایلې او نوموړي ته یې له لومړي څارن څخه د څارمن فوق العاده ترفیع مبارکي وویله او د بریالیتوب هیله یې ورته وکړه.
دغه راز ښاغلي قاضي زاده زیاته کړه، چې په هېواد کې دې داسې کادرونه زیاته شي، ترڅو په رښتینې توګه خپلو هېوادوالو ته د خدمت جوګه شي او هم له خپلې خاورې دفاع او ساتنه وکړي.
د غونډې په پای کې ښاغلي ادریس خبرې وکړې او د وزارت له مشرتابه څخه یې د مننې په ترڅ کې ژمنه وکړه، چې خپله دنده به په پوره صداقت سره پرمخ بیایې او په هر ډول شرایطو کې به خپل مسؤلیت ته ژمن وي.
