د هيواد په ۳۴ ولايتونو کې د ولسواليو په سطحه د پيل شويو غونډو دوام
دوشنبه ۲۷ ربيع الثاني ۱۴۴۷
د هيواد په ۳۴ ولايتونو کې د ولسواليو په سطحه د پيل شويو غونډو په دوام دا ځل د کاپيسا ولايت په نجراب، د کندهار په مرکز، دامان، ښورابک او خاکريز ولسوالي، د بادغيس په تګاب عالم، د تخار په چال او د کنړ ولايت په نرنګ او خاص کنړ ولسوالي کې له عامو خلکو سره د هغوی د ستونزو د اورېدو په موخه غونډې ترسره شوې.
د غونډو پر مهال مسؤلينو د اميرالمؤمنين حفظه الله هغه فرمان ولوست، چې د سيمه ييزو ناوړه دودونو او رواجونو د مخنيوي په اړه صادر شوی دی. دوی له خلکو وغوښتل، چې د ياد فرمان د عملي کولو په برخه کې خپل مسئوليت ادا کړي او د اسلامي اصولو په پلي کولو کې له اسلامي امارت سره همکاري وکړي. مسؤلينو همداراز ولسونو ته ډاډ ورکړ، چې د هرې لويې او وړې ستونزې د حل لپاره يې شپه او ورځ هڅې کوي او دا خپل ايماني، اسلامي او هيوادنی مسؤليت ګڼي.
قومي مشرانو د غونډو پر مهال په خپلو ويناوو کې د اوسني نظام له خدمتونو مننه وکړه او ياد نظام يې د هيواد د ثبات، امنيت او ولسونو د خونديتوب لپاره مهم وباله. هغوی له مسؤلينو مننه وکړه، چې د ولس غږ ته غوږ نيسي او د خلکو د ستونزو د حل لپاره هڅې کوي.
