د نیمروز والي سره د سرحدونو او قبایلو چارو وزارت د پلاوي کتنه
د دوشنبې په ورځ د (۱۲/۷/۱۴۴۳) له غرمې مخکې د سرحدونو او قبایلو چارو وزارت پلاوي د نیمروز له والي ښاغلي نجیب الله (رفیع) سره وکتل.
د نیمروز والي نجیبالله رفیع راغلي پلاوي ته د ښه راغلاست ویلو ترڅنګ، د نیمروز ولایت د سرحدونو او قبایلو چارو په ریاست کې د شته ستونزو او د هغې د حل په اړه خبرې وکړې او ډاډ یې ورکړ چې د نیمروز ولایت د سرحدونو او قبایلو چارو ریاست ته به یو ښه، عالم او ولس دوسته شخصیت وروپېژني.
د سرحدونو او قبایلو چارو وزارت د پلاوي رئیس مولوي محمد اسماعیل د سرحدونو او قبایلو چارو وزارت کې د بې نظمیو له منځه وړلو په برخه کې د دغه ولایت د والي له هلو ځلو ستاینه وکړه او د سرحدونو د ارزونې، د نیمروز ولایت د کوچیانو امریت د ادغام او د هېواد د پولې هغې غاړې د مېشتو قومونو او د مرستندویه بنسټونو د همکاریو د جلب په اړه ګډ بحث وشو.
دغه راز، په یوه جلا کتنه کې د سرحدونو او قبایلو چارو وزارت پلاوي د نیمروز ولایت له امنیه قوماندان سره وکتل او د هغوی له لارښوونو سره سم یې د سرحدي کرښې له بېلابېلو صفري نقطو او امنیتي پوستو څخه لېدنه هم وکړه.
د یادونې وړ ده چې د دوشنبې په ورځ له غرمې وروسته د سرحدونو او قایلو چارو وزارت باصلاحیته پلاوي د یاد وزارت د داخلي تفتیش له رئیس نیازمحمد تقي سره په همغږۍ د نیمروز ولایت د کوچیانو امریت ارزونه وکړه.
