د نورستان ولایت له یو شمېر دیني عالمانو او قومي مشرانو سره کتنه
د سرحدونو، قومونو او قبایلو چارو وزیر الحاج ملانور الله نوري په خپل کاري دفتر کې د نورستان ولایت د نورګرام ولسوالي له یو شمېر دیني عالمانو، قومي مشرانو سره د دفاع وزارت اړوند د فرمانونو او حکمونو د تعقيب له رئیس قاري محمد حنیف ازاد سره وکتل.
په دې کتنه کې راغلیو قومي مشرانو د خپلو سیمو یو د لړ ستونزو د شریکولو تر څنګ له سرپرست وزیر څخه وغوښتل چې د دوی د غصب شویو ځمکو د راګرځولو په برخه کې دې ورسره همکاري وکړي.
د سرحدونو، قومونو او قبایلو چارو وزیر الحاج ملانور الله نوري د نورستان له راغلیو قومي مشرانو او ديني عالمانو څخه په مننې وویل نورستان موږ ته له ځانګړي اهمیت څخه برخمن ده او ولس ته یې رسیدنه زموږ په لومړیتوبونو کې قرار لري.
ښاغلي نوري څرګنده کړه چې د یاد وزارت دروازه د افغانستان د ټولو ولسونو پر مخ خلاصه ده او دوی ته یې ډاد ورکړ چې ستونزې به یې تر اړوندو مراجعو رسوي.
