د ننګرهار له والي سره د سرحدونو او قبايلو چارو د سرپرست او نوماند وزير ناسته!
د سرحدونو او قبايلو چارو سرپرست او نوماند وزير محترم محب الله صميم او ملګري پلاوي يې نن ماښام د تلې مياشتې په ۱۶ مه نېټه د ولسمشر له سلاکار او د ننګرهار له والي ښاغلي ضيا الحق امرخېل سره وکتل.
په دې کتنه کې دواړو لورو د قومونو د انسجام، د سولې او ملي يووالي په ټينګښت کې د قومي مشرانو د رول، د ولسي غونډو او جرګو له لارو د سولې، جمهوري نظام او ملي امنيتي او دفاعي ځواکونو څخه د ولسونو د ملاتړ او د حکومت او ولس ترمنځ د واټن د رالڼډولو په باب بحث او خبرې وکړې.
دغه راز ښاغلي صميم په ننګرهار کې د وزارت له خوا د يوې ولسي جرګې د جوړولو موضوع شريکه کړه او په دې برخه کې يې د ښاغلي امرخيل د همکاری غوښتنه وکړه، چې د ښاغلي امرخېل له خوا ورسره د هر ډول همکاريو ژمنه وشوه.
د يادونې وړ ده، چې ښاغلي محب الله صميم او د غونډې ټولو ګډونوالو د غني خېلو او لغمان د وروستيو خونړيو پېښو د شهيدانو پاک روح ته دعا وکړه.
