د لوګر ولایت له قومي مخورو سره ناسته وشوه
سه شنبه/۱۲/ شوال المکرم/۱۴۴۴
د سرحدونو، قومونو او قبایلو چارو وزارت سرپرست الحاج ملا نورالله نوري د لوګر ولایت مېشت احمدزي قوم له مشرانو سره د هغوی د ستونزو اورېدلو او همغږۍ په موخه د وزارت د ناستو په تالار کې وکتل.
په دغه ناسته کې د وزارت سرپرست ښاغلی نوری، د مسلکي چارو معین مولوي عبدالرحمن حقاني، د لوګر ولایت د سرحدونو، قومونو او قبایلو چارو رئیس مولوي رهبر، د مرکز او ولسوالیو قومي مخورو ګډون کړی وو.
په پیل کې د قومي مشرانو په استازیتوب څو تنو خبرې وکړې او زیاته یې کړه چې د لوګر ولایت ټول مېشت احمدزي قومونه لکه چې د تېر اشغال په دوران کې د جهاد ملاتړي و اوس هم د ا.ا.ا په کلکه ملاتړ کوي او تر څنګ یې ولاړ دي. دوی په یاد ولایت کې د ځمکو پر سر د اختلافاتو، د مؤسساتو نه پاملرنه او د ځینو نورو ستونزو د یادونې ترڅنګ له حکومت څخه د ازري سرحدي ولسوالۍ ته د پاملرنې، د شخړو هوارولو لپاره یوه پلاوي ټاکلو، او نورو انکشافي پروژو په اړه د همکاريو غوښتنه وکړه.
ورپسې سرپرست وزیر ښاغلي نوري د دوی له راتګ څخه قدردانی وکړ او ویې ویل: ولس د هر نظام د ملا تير دی، په افغانستان باندې چې هرځل کوم نړیوال قدرت حمله کړې د همدې ولس پر مټ په شا تمبول شوی دی، د دې ولس په برکت نن په دې هیواد کې اسلامي نظام قائم دی، په وينا يې چې اوس په بمبار او چاپو کې افغانان نه وژل کيږي.
نوموړي ټولو مشرانو ته ډاډ ورکړ او زیاته یې کړه: لکه څنګه چې مو په امنیتي برخه کې مثبت ګام اخیستی همداسي به په انکشافي او اقتصادی برخو کې هم د خودکفایي لور ته ځو، ستاسې غوښتنې منو او تر اړوندو ادارو پوري یې رسوو.
مجلس د مسلکي چارو معین ښاغلي حقاني په دعا کولو سره پای ته ورسېد.
