د غزني ولايت په مرکز کې يوه لويه شخړه حل او په لوګر کې هم دوه خېلونو له دښمنۍ لاس واخيست
دوشنبه ۲۰/۳/۱۴۴۶
د غزني ولايت په مرکز کې د دوو قومونو تر منځ د کرکيلې (زراعت) پر سر هغه شخړه هواره شوه، چې له یوه لوري پکې يو کس وژل شوی وو او ترمنځ يې د دښمنۍ لويې او ژورې ناندرۍ روانې وې.
د دغه ولايت د سرحدونو، قومونو او قبايلو چارو رياست د مسؤلينو په هلو ځلو، د ځايي قومي مشرانو، علماوو او ا.ا.ا د ځينو منسوبينو په شريکو همکاريو ياده شخړه هواره شوه او ښکېل اړخونه يې سولې ته راوبلل. شخړه کوونکو کورنيو په خپله روغه جوړه خوښي څرګنده کړه او ژمنه يې وکړه چې په آينده کې به بيا داسې جنجالونه نه تکراروي.
همدا راز د لوګر ولايت د سرحدونو، قومونو او قبايلو چارو رئيس مولوي محمد عالم (رهبر) په مشرۍ ، د سيمه ییزو مشرانو، قومي سپين ږيرو، علماوو او ا.ا.ا د مشرانو په هڅو په ياد ولايت کې د دوو خېلونو ترمنځ هغه شخړه حل شوه چې دوه تنه پکې ټپيان شوي وو او تر شا يې لويې قومې ستونزې پريښې وې. دغه ستونزه چې درې مياستې وړاندې په ياد ولايت کې پيښه شوې وه د يوې جرګې په ترڅ کې په داسې حال کې هواره شوه، چې مسؤلينو ښکېلو خواوو ته په سوله، اخوت، اتفاق، او ورور ولۍ ټينګار وکړ، هغوی يې يووالي ته راوبلل او د دښمنۍ په بدو عواقبو يې وپوهول.
