د سرحدونو او قبایلو چارو وزارت پلاوي د هلمند ولایت د سرحدونو او قبایلو چارو له ریاست څخه لېدنه وکړه
د پنجشنبې په ورځ (۷/۸/۱۴۴۳) نېټه د سرحدونو او قبایلو چارو وزارت یو با صلاحیته پلاوي د هلمند ولایت د سرحدونو او قبایلو چارو ریاست څخه لېدنه وکړه. په پیل کې د هلمند ولایت د سرحدونو او قبایلو چارو رییس مولوي عبدالهادي حماد راغلي پلاوي ته ښه راغلاست ووايه او دغه راز يې د هلمند ولایت خانشین او دیشو ولسوالیو ته د خپلو سفرونو په اړه بشپړ معلومات وړاندې کړل. د راغلي پلاوي مشر مولوي محمد اسماعيل غزنوي د ډيورنډ فرضي کرښې ته څېرمه د مېشتو قومونو د ستونزو اورېدو او د هغوی د ستونزو د حل په خاطر سرحدي ولسواليو ته د مولوي صاحب حماد پر سفر خوښي څرګنده کړه. دغه راز، د وزيرانو شورا له پرېکړې سره سم د هلمند ولايت د سرحدونو او قبايلو چارو له رياست سره د کوچيانو چارو رياست د ادغام په اړه لارښوونې وشوې. ورپسې د سرحدونو او قبایلو چارو وزارت د داخلي پلټنې رییس مولوي نیاز محمد تقي د هلمند ولایت د سرحدونو او قبایلو چارو ریاست د کړنو، د ملکیتونو او نورو شته اجناسو څېړنه او ارزونه وکړه. د يادونې وړ ده چې په دې ناسته کې د ډيورنډ فرضي کرښې د کليو د اوسېدونکو د امنيت د ټينګښت په موخه د سرحدي لوا او د ولسواليو د امنيې قوماندانیو پر همغږۍ ټینګار او هراړخيزې خبرې وشوې.
