د سرحدونو، قومونو او قبایلو چارو وزارت کارکونکو ته د ښوونېزې اړتيا سنجونې په مناسبت یو غونډه تر سره شوه!
چهارشنبه ۱۴۴۶/۵/۴
د اداري اصلاحاتو کمیسیون، د سرحدونو، قومونو او قبايلو چارو وزارت سره په همغږي د یاد وزارت کارکونکو د ظرفیت لوړولو او د ښوونې اړتیاوو د تشخیص لپاره یو پروګرام د پوښتنلیکونو په وېشلو سره تر سره کړ.
یاد پروګرام د قرآن کریم د څو آیتونو په تلاوت سره پیل شو. ورپسې د بشري زیرمو رئیس مولوي کریم شاه تیلوی د اداري اصلاحاتو کمیسیون څخه راغلو مسئولینو ته هرکلی ووايه او د اسلام له نظره یې د زده کړو پر اهمیت او ارزښت رڼا واچوله زیاته یې کړه چې د پوښتنلیکونو له ویشلو څخه هدف د کارکونکو د ښوونې اړتیاوې مشخصول دي، ترڅو په راتلونکي کې دغه وزارت د دې اړتیاو پر بنسټ د کارکونکو لپاره تعلیمي او د ظرفیت لوړولو پروګرامونه په لاره واچوي.
همداراز د اداري اصلاحاتو کمیسیون مرستیال ښاغلي مفتی فرید احمد، په دولتي ادارو کې د چارو په چټکولو او اسانه کولو خبرې وکړې. ویې ویل: د داسې پروګرامونو جوړولو هدف په ادارو کې د علمي کادرونو استخدام، کار اهل کار ته سپارل، ښه حکومتولي، د کار پروسې ساده کول او له کاغذ پرانې څخه د مخنیوي لپاره په لار اچول کيږي. په پای کې د اداري اصلاحاتو کميسيون څخه د راغلويو مسئولینو له لوري پر کارکونکو فورمونه وویشل شول چې له ډکولو وروسته راټول او د ارزونې په موخه اړوندې ادارې ته انتقال شول.
