د اسلامي نظام او ملي یووالي د استحکام ستره ولسي غونډه
۲۶\۸\۱۴۴۵ هـ ق
د سرحدونو، قومونو او قبایلو چارو وزارت د لوړ پوړي پلاوي په مشرۍ په ننګرهار ولایت کې د ختیځ زون په کچه یوه ستره ولسي غونډه تر سره شوه، چې پر مهال يې د یاد وزارت سرپرست الحاج ملا نور الله نوري، د امر بالمعروف نهی عن المنکر او سمع شکایاتو وزیر شیخ محمد خالد الحنفي، د یاد وزارت معینانو، د اسلامي امارت مسؤلینو، دیني علماوو، قومي مشرانو او عامو خلکو ګډون کړی وو.
قومي مشرانو د خبرو پر مهال وویل: دا د شکر ځای دی، چې د هیواد په کچه داسې ناستې جوړېږي، چې ولسونه یو له بل سره خواله کوي او خپلې ستونزې له خپل نظام سره شریکوي.
دوی زیاته کړه: نور دلته هیڅ چا ته اړتیا نشته، هیڅ پردی نور په دې خاوره کې ځای نه لري او موږ ټول ولسونه د دې نظام د بقا لپاره د نظام ملاتړي یو.
قومي مشرانو وویل: له حکومت څخه غوښتنه کوو چې د کونړ سیند مهار شي، تر نورستان پورې د لویې لاره ورغول شي، د ولسوالیو تر منځ سرکونه، روغتیایي کلینیکونه، برېښنایي بندونو رغولو او د شخړو د حل په برخه کې د پاملرنې غوښتونکي شو.
د کوچي قومونو په استازیتوب یوه تن وویل: کوچي قشر په هیواد کې له نورو قومونو سره په ګډه قربانۍ ورکړې او د اشغال پر وړاندې یې مبارزه کړې ده.
دا نظام له داسي کسانو څخه تشکیل شوی چې مسؤلین یې د ولس خادمان دي نه آمرین، د دې نظام امیر المؤمنین د اسلام د بقاء لپاره خپل د کورنۍ غړي قرباني کړي.
د غونډې پر مهال شیخ محمد خالد الحنفي په خپلو خبرو کې وویل: د هیواد پرمختګ د ولسونو په اُخوت او ورورۍ کې دی.
ښاغلي حنفي زیاته کړه: د دې هیواد یو څو بچیان د بهرنیانو سره یو ځای ولاړل، اوس له هغه ځایه د هیواد پر ضد شوم تبلیغات کوي، خو دا هر څه دوی ته هیڅ ګټه نه کوي، ځکه تاسې دا نظام وینئ او خپل نظام مو له نږدې مطالعه کوئ.
د جرګو او قبایلو چارو د همغږۍ معین مولوي محمد علي جان احمد وویل: نړیوالو ځواکونو افغان قومونه سره ووېشل، کور په کور او کلي په کلي یې بدۍ واچولې او د افغانانو وینې یې توی کړې.
دوی افغانان د قوم، ژبې او سمتونو په نومو باندې ووېشل.
هغه زیاته کړه: دې نظام ته د نورو حکومتونو په سترګو مه ګورئ!
ولسه! دا ستاسې په برکت راغلی نظام دی، دا نظام د هیڅ یوه پردي په همکارۍ نه دی راغلی.
په پای کې د سرحدونو، قومونو او قبایلو چارو سرپرست الحاج ملا نور الله نوري وینا وکړه: چې تاسې ولسونه او قومي مشران ټول مجاهدین یاست، تاسې د روس او انګرېزانو پر وړاندې کلک جهاد کړی، ټول دنیاوال په دې قانع دي چې افغانانو د جهاد او قربانیو په نتیجه کې یو سوچه اسلامي نظام پایدار کړی.
ښاغلي نوري زیاته کړه: نه دا ملت بل څوک لري، نه له داسي حکومت څحه بل څوک برخمن دي، راځئ! له تېر جهاد څخه عبرت واخلو او خپله خپلواکي وساتو او د غرب په تبلغاتو ونه غولېږو، لکه پرون چې مو سنګر فریضه وه، نن مو د نظام ساتنه فریضه ده. نن داسې ورځ راغلې چې ځمکه ستا ده، نظام ستا دی، مسؤلین ستا دي او دفتر هم ستا دی.
هغه زیاته کړه: موږ ستاسې مسؤلین نه بلکې ستاسې خادمان یو، ستونزې او غوښتنې به مو د خپل وس په انداره حل کوو او تر لوړ پوړو چارواکو به یې رسوو.
