بلخ کې ۵ کلنه سمنګان کې ۴ کلنه او کاپيسا کې هم شخړه هواره شوه

سه شنبه ۲۰ صفر المظفر ۱۴۴۸

د بلخ ولايت د سرحدونو، قومونو او قبايلو چارو رياست د مسؤلينو لخوا د دغه ولايت په مرکز کې د دوو تنو هېواد والو ترمنځ د ځمکې د ملکيت له کبله راپورته شوي اختلافات د منځګړو مشرانو په ملتيا د خبرو اترو له لارې هوار کړل او هر کس د خپل حق خاوند شو.

په ورته مهال د سمنګان ولايت په ايبک کې د دوو کورنيو ترمنځ د څلورو کلونو دوامدار جنجالونه د دغه ولايت د سرحدونو، قومونو او قبايلو چارو آمريت د استازو، ديني عالمانو او قومي مشرانو په هڅو داسې مهال پای ته ورسېدل، چې ښکېلو غاړو يو بل ته د بښنې په کولو سره د خوښي غاړې ورکړې.

همداراز د کاپيسا ولايت حصه دوم کوهستان ولسوالي کې د څوتنو اوسېدونکو ترمنځ د راپورته شويو ستونزو او بدبينو له امله، چې يوکس پکې ټپي شوی و د ياد ولايت د سرحدونو، قومونو او قبايلو چارو آمريت د مسؤلينو له لوري حل او طرفينو د ورورولي ژوند پيل کړ.

دا په داسې حال کې ده، چې د سرحدونو، قومونو او قبايلو چارو وزارت په ولايتونو کې د خپلو اړوندو ادارو د مسؤلينو په مرسته هره ورځ د ولسونو ترمنځ دې ته ورته شخړې او جنجالونه هواروي ترڅو خلکو ته د ارام او هوسا ژوند زمينه برابره شي