په خوست کې د ماشوم د قتل پرسر د پېښې شوې شخړې پخلاینه وشوه
سه شنبه /۴/ذولقعده/۱۴۴۷
د خوست ولایت باک ولسوالۍ اړوند په ترکیو سیمه کې هغه دوښمني چې د دوو اړخونو د جنګ په پایله کې یو ماشوم پکې په قتل رسیدلی وو، د نوموړي ولایت د سرحدونو قومونو او قبایلو چارو ریاست او مخورو مشرانو په هلو ځلو حل او په دوستي بدله شوه.
د دې دُښمني د حل لپاره یادو مسؤلینو څو ځلې له طرفینو سره لیدنې کتنې وکړې، چې د هڅو په پایله کې یې دواړه خواوې روغې جوړې ته راضې شوې. د دغې شخړې د حل پاره یو ناسته راوبلل شوه، چې په ترڅ کې یې مولوي میا محمد ولي صدیقي د یاد ریاست رئیس له ښکېلو اړخونو په مننه وکړه او د دوی دغه نېک ګام یې د ډېرې ستاینې وړ وباله.
هغه زیاته کړه: دا زمونږ ایماني او وجداني مسؤولیت دی چې د دوو مسمانانو تر منځ روغه جوړه وکړو، ترڅو په خپله سیمه او هېواد کې دغه شان سترې بدمرغۍ له منځه یوسو.
قومي مشرانو او د مرکې ګډونوالو د دغې شخړې پر حل خوښي څرګنده کړه او د سرحدونو، قومونو او قبایلو چارو وزارت له ستړیاوو په مننې سره یې وویل، چې دوی د یاد ریاست په ملتیا یوازې په خوست کې د ۱۰۷ شخړو او دُښمنیو د حل شاهدان دي، چې دا له ولسونو سره د اسلامي امارت د مینې او شفقت یوه ښکاره بېلګه ده.
