د رحمن بابا عالي لېسې له ښوونکو او زده کوونکو سره کتنه
دوشنبه ٩ ذوالقعدة الحرام ١٤٤٤
د سرحدونو، قومونو او قبایلو چارو وزارت د اداري مجلس د پرېکړې پر اساس د وزارت اړوند په تعلیمي مرکزونو کې د اخلاقي او سالم ښوونیز چاپېریال د رامنځته کولو په موخه د دعوت او ارشاد رئیس ښاغلي مفتي شفیع الله ثاقب په مشرۍ مؤظفې کمېټې د رحمن بابا لېسې له ښووونکو او زده کوونکو سره ديوې غونډې په ترڅ کې وکتل. ياده کتنه د قرآن عظیم الشان د څو مبارکو آیاتونو په تلاوت پیل شوه. ورپسې د مؤظفې کمېټې مشر ښاغلي مفتي شفیع الله ثاقب د اسلامي ثقافت په رڼا کې د ښوونې او روزنې پر ارزښت خبرې وکړې او ویې ویل: ستاسې د زده کړې او پوهې د تر لاسه کولو هدف باید هېواد، ولس او خپلو ارزښتونو ته خدمت کول وي. ښاغلي ثاقب دغه راز زده کوونکو ته د دنیوي او اخروي ژوند په اړه هر اړخيز معلومات وړاندې کړل او ټول مسلمه امت ته یې د ښېرازۍ دعا وکړه. د وزارت د داخلي تفتیش رئیس ښاغلي مولوي نیاز محمد تقي وويل په اړوندو لېسو کې د مثبتو بدلونونو له کبله د زده کوونکو ستونزې حل شوې دي او کومې ستونزې چې شتون لري ان شاء الله ډېر ژر به ورته د حل لارې چارې پیدا کړو نوموړي همداراز له ښوونکو څخه مننه وکړه چې د يادې لېسي د زدکوونکو په روزنه کې زيار باسي او دغه راز يې زده کوونکي خپلو زده کړو ته د پاملرنې لپاره وهڅول. د کمېټې مشر او غړو له ښوونکو سره په ځانګړې غونډه کې د دوی وړاندیزونه او غوښتنې واورېدې او د وزارت مقام سره یې د حل په موخه د شریکولو ژمنه وکړه. ياده کتنه د ښوونې اوروزنې د رئیس ښاغلي مولوي عبدالرحمن رحماني په دعاء پای ته ورسېده.
