موقت حکومت نه منو، ټاکنې د ولسواک او مشروع نظام لپاره اساسي شرط دى

دغه خبرې نن د روان کال د وږي مياشتې په 22 مه نېټه د سرحدونو او قبايلو چارو وزير محترم محمد شفيق ګل اغا شېرزي له ګڼو قومي مشرانو، مخورو، ځوانانو او ټولنيزو فعالانو سره په کندهار کې د يوې پراخې غونډې په ترڅ کې وکړې زياته يې کړه: تاسو قومي مشران کولاى شئ په خپلو سيمو کې د خپلو قومي ظرفيتونو او نفوذ له لارې ولسونه ټاکنو کې پراخ ګډون ته وهڅوئ .

ښاغلي شېرزي د ټاکنو له لارې د مشروع نظام د دوام لپاره ټاکنې اساسي شرط وباله، نوموړي د خپلو خبرو پر دوام يو ځل بيا پر طالبانو غږ وکړ، چې له افغان دولت او ملت سره اوربند وکړي.

ورپسې څو تنو قومي مشرانو او مخورو د ښاغلي شېرزي خبرې تاييد کړې او له موجوده نطام څخه يې د ملاتړ په ترڅ کې ژمنه وکړه، چې خپل خلک به ټاکنو کې د پراخ ګډون لپاره هڅوي، تر څو هېواد بحران ته له تلو څخه وژغورل شي.