په پکتیا کې د دوو کورنیو ترمنځ ۷ کلنه قومي بدی پای ته ورسېده
شنبه ۲۹ ربيع الأول ۱۴۴۸
د پکتیا ولایت ډنډې پټان ولسوالۍ اړوند د خرکي کلي کې د دوو کورنیو ترمنځ ۷کلنه قومي بدي، چې له امله یې یو تن وژل شوی و، د یاد ولایت د سرحدونو، قومونو او قبایلو چارو ریاست مسؤلینو د حل منازعاتو کمېټې غړو، سیمه ییزو مسؤلینو، قومي مشرانو او علماوو د پرله پسې هڅو په پایله کې پای ته ورسېده.
د یادې روغې جوړې په مراسمو کې مسؤلینو د خپلو خبرو پر مهال د اسلام د مبارک دین له لارښوونو سره سم د عفوې، اخوت او ورورولۍ ارزښت بیان کړ او دا یې د ټولنې د ثبات او یووالي لپاره مهم وبلل. هغوی څرګنده کړه چې د کورنیو ترمنځ د اختلافاتو دوام یوازې پر ښکېلو لورو اغېز نه کوي، بلکې د ټولنې د نورو غړو پر یووالي او اړیکو هم منفي اغېز پرېباسي.
په پای کې د منځګړو له لوري د یادې شخړی د پایته رسیدو په مناسبت ترتیب شوې پرېکړه اعلان شوه، چې دواړو لورو په ورین تندي ومنله او یو بل ته یې د دوستۍ غېږې ورکړې
