ارزګان کې د يوې ترافيکي پېښه له امله راپورته شوې شخړه هواره شوه
چهار شنبه ۱ محرم الحرام ۱۴۴۸
د ارزګان ولايت په مرکز ترينکوټ کې د يوې ترافيکې پېښې له امله راپورته شوې شخړه د ياد ولايت د سرحدونو، قومونو او قبايلو چارو آمر ملا عبدالهادي حاجي امين په مشري د قومي سپين ږيرو او ديني عالمانو په هڅو پای ته ورسېده.
د يادې ترافيکي پېښې پرمهال يوماشوم خپل ژوند بايللی و، چې له کبله يې د دوو کورنيو ترمنځ لويې اندېښنې او جنجالونه راپورته کړي وو. د دغو جنجالونو د هواري په موخه مسؤلينو د يوې رابلل شوې جرګې په ترڅ کې د خير فيصله وکړه او دواړه لوري يې سره پخلا کړل.
د يادې پېښې د قرباني شوې کورنۍ مشرانو د ترسره شوې فيصلې له مخې مقابل لوری وبښه او ژمنه يې وکړه، چې تردې وروسته به هېڅ ډول جنجالونه سره نه کوي.
