خوست کې د ۱۶۰ کالو اوږدمهاله مرګوني دښمني پای ته ورسېده
شنبه ۱ ذوالقعده الحرام ۱۴۴۷
په خوست ولایت کې دغه مرګونې دښمني، چې شاوخوا ۱۶۰ کاله یې دوام کړی و او د تېرې یوې نیمې پېړۍ په اوږدو کې له دواړو لوريو دوه دوه تنه پکې وژل شوي وو د ياد ولايت د سرحدونو، قومونو او قبایلو چارو ریاست د مسؤلينو، قومي مشرانو، علماوو او متنفذينو د هڅو په پایله کې د بخښنې او پخلاینې له لارې پای ته ورسېده.
د روغې جوړې په جوړو شويو مراسمو کې مسؤلینو او د علماوو استازو ویناوې وکړې. په ویناوو کې ټینګار وشو چې د شخړو د حل لپاره ځانګړی کمیسیون جوړ شوی او تر دې مهاله ګڼې ورته شخړې د قومي مشرانو په همکارۍ هوارې شوې دي. همداراز د دواړو خواوو له لوري د بخښنې او پخلاينې دا ګام وستایل شو.
د مراسمو په پای کې د جرګه کوونکو له خوا د روغې جوړې فیصله اعلان شوه، چې دواړو کورنیو پرې رضایت وښود او ژمنه یې وکړه چې له دې وروسته به د هر ډول دښمنۍ او کرکې څخه ډډه کوي. په ورستۍ برخه کې د دواړو لوريو مشرانو یو بل ته غاړه ورکړه او په دې توګه يې د کلونو پخوانۍ دښمني په سوله بدله شوه.
