له ۲۶ کلنې بدي وروسته د دوو کورنیو پخلاینه!
شنبه ۱۱ زمری ۱۴۰۴ د کابل په پغمان ولسوالۍ کې د دوو کوچي کورنیو ترمنځ ۲۶ کلنه دُښمني د سرحدونو، قومونو او قبایلو چارو وزارت د کوچیانو چارو سمون ریاست اړوند د کوچي سرخېلانو، متنفذینو او سیمه ییزو عالمانو په منځګړیتوب حل او د یوې مرکې په ترڅ کې په دوستي بدله شوه. دغه بدي د یادو کورنیو ترمنځ د فزیکي شخړې له وجهي رامنځته شوې وه، چې له امله یې د خان ګل په نامه ځوان ژوند له لاسه ورکړی و او د دواړو کورنیو ترمنځ یې سختې ناخوالې رامنځته کړې وې. د یادې دُښمني د حل په موخه کوچي سرخېلانو او نورو سیمه ییزو مصلحینو د مقتول او قاتل له کورنیو سره ناستې وکړې او دواړه خواوې یې د یوې دودیزې مرکې په ترڅ کې روغې جوړې ته راضي کړل، چې په دې سره، له دوه نیمو لسیزو راهیسې په بدي کې ښکېلو لوریو سولې ته غاړه کېښوده او له مرکچیانو سره یې ژمنه وکړه چې نور به د اخوت ژوند تېروي.
