په زابل ولايت کې د غصب مخنيوي کمېسیون غړي له یو لړ مسؤلینو سره وکتل
چهار شنبه ۱۴۴۶/۷/۱۴
د سرحدونو، قومونو او قبايلو چارو وزارت د سرحدي پلټنو معين او د غصب کمېسيون غړي الحاج مولوي محمد اسماعيل غزنوي د یوه پلاوي په مشري د زابل له مرستيال والي الحاج مولوي محب الله حماس سره په داسې حال کې وکتل چې د ياد ولايت د بېلا بيلو رياستونو رئيسانو او د اسلامي امارت مسؤلينو حضور درلود.
په دغه کتنه کې ښاغلي غزنوي زابل ولايت ته د خپل سفر په تړاو معلومات وړاندې کړل، نوموړي د غصب شوطو ځمکو بېرته راګرځول د غصب مخنيوي کمېسيون لخوا د معنوي او ارزښتناکو برخو څخه ياد کړل هغه زياته کړه: ولسونو د همدې نظام د حاکميت لپاره قربانۍ ورکړې، پکار ده چې حق يې ادا شي، د هوسا ژوند او اقتصادي پرمختګ لپاره يې شپه او ورځ کار وشي. ښاغلي غزنوي د زابل ولايت د غصب مخنيوي کمېسيون له غړو وغوښتل چې خپل فعاليتونه د يوه ځانګړي طرزالعمل له مخې په ښه همغږۍ برابر کړي.
ورپسې د زابل ولايت مرستيال والي ښاغلي حماس د ښه راغلاست ترڅنګ ورغلي پلاوي ته د پوره همکارۍ ډاډ ورکړ او همدارنګه يې د ياد ولايت د غصب مخينوي اړوند ستونزې هم شريکې کړې، چې د ښاغلي غزنوي لخوا په بېلا بېلو برخو کې اړينې سپارښتنې هم ورته وشوې.
