په سرحدي ولسواليو او ډېورنډ فرضي کرښې ته څېرمه ولسوالیو کې د خدمتونو وړاندې کولو په موخه مرکزي کمېټې ناسته وکړه
دوشنبه ۱۴۴۶/۶/۱۴
د سرحدونو، قومونو او قبايلو چارو وزارت د رياست مقام د دفتر رئيس الحاج مولوي نياز محمد تقي په مشرۍ په سرحدي او ډېورنډ فرضي کرښې ته څېرمه وولسواليو کې د اوليه خدمتونو وړاندې کولو، د پروژو د لاښه پلي کيدو، د چارو د سمون او همغږۍ په موخه د ياد وزارت مرکزي کمېټې ناسته ترسره کړه.
په دغه ناسته کې د ياد وزارت مرکزي کمېټې ځينو غړو ته دنده وسپارل شوه، چې د پکتيا، پکتيکا او لوګر ولايتونو ته د سفر پرمهال د ځايي خلکو ستونزو ته په کتو د پيل شویو پروژو کارونه و ارزوي، اسناد يې راټول کړي، ستونزې يې تشخيص کړي او بيرته يې د مرکزي کمېټې له مشرانو سره شريکې کړي.
دا په داسې حال کې ده چې د امیرالمؤمنین حفظه الله د حکم پربنسټ د سرحدونو، قومونو او قبايلو چارو وزارت ته دنده سپارل شوې وه، چې د لرې پرتو سیمو لومړنۍ ستونزې له نږدې وګوري او په دې اړه معلومات د امیرالمؤمنین حفظه الله تعالی له مقام سره شریک کړي تر څو د یوې ځانګړې کړنلارې له مخې له خدمتونو څخه بې برخې ولسونو ته د سرکونو، روغتیا، اوبو اوانرژۍ، مخابراتو ښوونې او روزنې په برخو کې ستونزې تشخیص شي او کارونو یې پیل شي.
