د زمري ۷مه، د بیرغ ملي ورځ ونمانځل شوه!
د بیرغ د ملي ورځې په مناسبت مراسم نن د زمري پر اوومه نېټه د سرحدونو او قبایلو چارو په وزات کې پرځای شول.
په دې مراسمو کې د سرحدونو او قبایلو چارو وزیر ښاغلي محب الله صمیم، د وزارت معینانو او چارواکو ګډون کړی و.
د ګران هېواد درې رنګه ملي بیرغ د ښاغلي محب الله صمیم له لوري پورته شو دغه راز د وزارت افسرانو او ساتونکو د هېواد د بیرغ پورته کولو په ویاړ د احترام مراتب پر ځای کړل.
ښاغلي صمیم، چې د بیرغ ملي ورځې په مناسبت یې خبرې کولې یاده ورځ یې ټولو افغانانو ته مبارکي وویله، زياته يې کړه: د هېواد ویاړلی ملي بیرغ زموږ د ویاړ، وقار، عزت او د ملي یووالي سمبول دی، تل دې هسک او رپانده وي.
نوموړي دغه راز وویل: تر څو، چې یو افغان ژوندی وي ساتو به یې، ځکه دا ملي بیرغ په ملي او نړیواله کچه زموږ د هویت، عزت، لوړوالي او ملي یووالي سمبول دی.
دغه راز یې د هېواد او ولس په مخالفینو هم غږ وکړ، چې په هوش او فکر راشي او ملي بیرغ ته په سپکه ونه ګوري او د همدې ملي بیرغ تر چتر لاندې سوله ییز او هوسا ژوندانه ته مخه کړي.
