په خوست ولایت کې د ډېورنډ فرضي کرښې ته څېرمه پرتو ولسونو د ستونزو د حل په موخه کمېټه جوړه شوه
سه شنبه ۱۴۴۶/۲/۱۶
د امیرالمؤمنین حفظه الله تعالی د حکم له مخې د سرحدونو، قومونو او قبایلو چارو وزیر الحاج ملا نورالله نوري د خپلو سفرونو په ترڅ کې ډیورنډ فرضي کرښې او د نورو سرحدي ولایتونو په سرحدي ولسوالیو کې د خلکو د لومړنیو ستونزو د تشخیص او تثبیت لپاره د کمېټې د جوړېدو په موخه خوست ولایت ته سفر وکړ. نوموړي د دغه سفر پر مهال د خوست ولایت د مرستيال والي مولوي محبوب شاه قانت په ګډون د کلیو پراختیا او بیا رغونې، اوبو او انرژي، عامې روغتیا، مخابراتو او معلوماتي ټکنالوجۍ، ټولګټو چارو، پوهنې، سرحدونو، قومونو او قبایلو چارو ریاستونو له رئیسانو، د سرحدي ولسوالیو له ولسوالانو او په یادو ولسوالیو کې د دفاع وزارت له مسؤلینو سره ناسته وکړه. د ناستې په ترڅ کې یې د خوست ولايت مرستيال والي مولوي محبوب شاه قانت په مشري د یادو ادارو له مسؤلینو څخه کمېټه جوړه کړه او سپارښتنه یې ورته وکړه تر څو ډېورنډ فرضي کرښې ته په څېرمه ولسوالیو کې د خلکو ضروري او اړینې ستونزې تشخیص او تثبیت کړي. ښاغلي نوري ګډونوالو ته د ناستې په ترڅ کې د مشرتابه مقام د حکم په اړه معلومات ورکړل او د غونډې له ناستو مسؤلینو څخه یې هغلته د پرتو ولسوالیو د خلکو د ستونزو د تشخیص او تثبیت په برخه کې د شفافیت غوښتنه وکړه. نوموړي په خپلو خبرو کې زیاته کړه " د ډيورنډ فرضي کرښې ته څيرمه پراته ولسونه پر موږ حق لري چې لومړنۍ اساسي ستونزې يې حل کړو ،ځکه دې خلکو په تېر شل کلن جهاد کې له مونږ سره مرسته کړې، د مجاهدينو خدمتونه يې کړي او ږه په اوږه يې جهاد راسره کړی" د یادونې وړ ده چې له دې وړاندې په ننګرهار، کنړ، نورستان او پکتیا ولایتونو کې هم ورته کمېټې جوړې شوې دي.
