په ننګرهار ولایت کې یوه ۵۰ کلنه شخړه په ورورولۍ بدله شوه
۲۵/۶/۱۴۴۵
د ننګرهار ولایت په اچین ولسوالۍ کې د دوو کورنیو تر منځ دښمني چې ۵۰ کاله یې دوام کړی و او له یوه لوري څخه پکې یو تن هم وژل شوی و، د یاد ولایت د سرحدونو، قومونو او قبایلو چارو ریاست او د سیمې د قومي مشرانو په هغمږۍ او منځګړیتوب په ورورولۍ بدله شوه.
د شخړې د حل په مراسمو کې د دغه ولایت د سرحدونو، قومونو او قبایلو چارو رئیس حافظ رحمت الله غازي عمر د امیرالمؤمنین د عفوي او نورو فرمانونو په ګټو خبرې وکړې او زیاته یې کړه: تر څو چې مو په ننګرهار ولایت کې قومي ستونزو او بدیو ته د پای ټکی نه وي ایښی په کرار به نه کینو.
د دغې ناستې پر مهال قومي مشرانو د یاد ریاست مسؤلینو ته ډاډ ورکړ چې له دوی سره اوږه په اوږه ولاړ دي او د اسلامي امارت تر چتر لاندې په یووالي او اتحاد سره په خوښي ژوند کوي.
