په زابل ولایت کې د همغږۍ غونډه ترسره شوه
۱/۵/۱۴۴۵
په زابل ولایت کې د سرحدونو، قومونو او قبایلو چارو وزارت سرپرست الحاج ملا نورالله نوري د یوه پلاوي په مشرۍ د مرکز قلات په شمول د ټولو ولسوالیو له قومي مشرانو او دیني عالمانو سره ناسته وکړه.
د ولسونو په استازولي څو تنو قومي مشرانو او دیني عالمانو د ورغلي پلاوي تر هرکلی کولو وروسته وویل چې ۴۸ کاله وروسته افغانان د امن پر ټغر را ټول دي چې دا ددې ولس د همکاري برکت دی. دوی زیاته کړه: موږ د خپلو قربانیو احسان پر چا نه اچوو، په تېر شل کلن انقلاب کې قربانۍ ورکول زموږ اسلامي وجیبه وه او د اوسني حاکم نظام ساتل هم خپل مسؤلیت بولو. دوی د اسلامي امارت په راتګ سره د هر چا د مال او عزت د خوندیتوب په اړه هم خبرې وکړې او په دغه ولایت کې د خلکو د ستونزو د حل غوښتونکې شول.
ورپسې د یاد وزارت سرپرست ښاغلي نوري هم د اسلامي امارت بریا ته رسېدل د ولسونو د ملاتړ برکت یاد کړ او ویې ویل: د افغانستان د مجاهد ولس له قربانۍڅخه د نړۍ خلکو د ازادۍ فکر اخیستی او له خپلو حکومتونو څخه آزادي او خپلواکي غواړي. نوموړي همدا راز وویل: افغانستان د اقتصاد له پلوه په ځان بسیاینې ته نږدې دی ځکه د دې هیواد کانونه او د اوبو مدیریت زموږ د هیوادوالو ټولې اړتیاوې پوره کولای شي او زه دا ډاډ درکوم چې په راتلونکي کې به افغانستان د نړۍ هیڅ هېواد ته محتاج نه شي.
